Cynilo gydag undeb credyd

Mae undebau credyd yn ffordd gyfleus a diogel o gynilo. Mae pob punt sy’n cael ei chynilo yn gyfwerth â chyfranddaliad unigol a gall aelodau gynilo cyn lleied neu gymaint ag a ddymunant. Gellir cronni cynilon yn gyflym unwaith y bydd yr arfer o gynilo wedi cael ei sefydlu ac mae aelodau’n cael eu hannog i barhau i gynilo hyd yn oed wrth ad-dau benthyciad.

Po fwyaf o gynilon sydd gan undeb credyd, mwyaf yr arian sydd ar ael i’w fenthyca i’r aelodau.

Pa mor ddiogel yw fy arian?

Mae undebau credyd y cael eu rheoleiddio gan yr Awdurdod Gwasanaethau Ariannol a rhaid iddynt gydymffurfio â Deddf Undebau Credyd 1979. Mae gan bob undeb credyd yswiriant sy’n diogelu eich cynilon rhag lladrad neu dwyll. Ar ben hyn, rhaid i bob undeb credyd fod â phwyllgor i oruchwylio ei weithgareddau o ddydd i ddydd.

Difidendau

Mae cynilon yn cael eu defnyddio i roi benthyg arian i’r aelodau. Mae’r llog a geir ar fenthyciadau yn cael ei ailfuddsoddi yn yr undeb credyd. Rhoddir unrhyw arian dros ben yn y gronfa neu fe’i defnyddir i dalu difidend i’r aelodau.

Tynnu arian

Mae croeso i aelodau dynnu arian ar unrhyw adeg. Fel arfer gofynnir am rybudd o wythnos, ar yr amod nad yw cynilon yr aelod yn sicrhau benthyciad. Fodd bynnag, mae aelodau’n cael eu hannog i warchod eu cynilon. Mae hyn yn sicrhau y gallwch ddal i wneud y canlynol:

• Ennill difidend
• Aros yn gymwys i gael credyd a pharhau i gael benthyg arian
• Elwa o yswiriant bywyd ar eich cynilon

Pobl ifanc yn cynilo

Mae’n rhaid i chi fod yn 16 oed neu’n hŷn i ddod yn aelod llawn ond mae llawer o undebau credyd yn rhedeg cynllun cynilo i bobl iau sy'n annog pobl ifanc i ymuno a meithrin yr arfer o gynilo arian. Bydd aelodau iau yn dod yn aelodau llawn yn awtomatig yn 16 oed ond yn ôl y gyfraith rhaid iddynt aros am ddwy flynedd eto cyn y byddant yn gymwys i gael arian ar fenthyg.